മുക്കം: അഞ്ചരക്കോടി രൂപ ചെലവില്‍ നവീകരണ പ്രവൃത്തി പുരോഗമിക്കുന്ന പിസി ജംഗ്ഷൻ-വെസ്റ്റ് മാമ്പറ്റ ബൈപാസില്‍ കുറ്റിപ്പാല അങ്ങാടിയോട് ചേർന്നുള്ള സാംസ്കാരിക നിലയവും അങ്കണവാടിയും പൊളിച്ചു നീക്കാതെ പ്രവൃത്തി പൂർത്തിയാക്കിയാല്‍ വീതി കൂട്ടുന്ന റോഡിന്റെ ഈ ഭാഗം കുപ്പിക്കഴുത്താകുമെന്ന് നാട്ടുകാർ.
സാംസ്കാരിക നിലയവും അങ്കണവാടിയും പൊളിച്ചു നീക്കിയില്ലെങ്കില്‍ റോഡ് നവീകരണ പ്രവൃത്തി തടയാനുള്ള ഒരുക്കത്തിലാണ് നാട്ടുകാർ. നിലവില്‍ അഞ്ചര മീറ്റർ വീതിയുള്ള റോഡ് ബിഎം ആൻഡ് ബിസി നിലവാരത്തില്‍ ഏഴു മീറ്ററാക്കി വികസിപ്പിച്ച്‌, ആവശ്യമായ സ്ഥലങ്ങളില്‍ ഓവുചാലുകളും സുരക്ഷാ ഭിത്തിയും നിർമിച്ച്‌ അന്താരാഷ്ട്ര നിലവാരത്തിലേക്ക് ഉയർത്തുന്നതാണ് പദ്ധതി.
റോഡിന്റെ മറ്റു ഭാഗങ്ങളില്‍ വീടുകളുടെ ചുറ്റുമതില്‍ ഉള്‍പ്പെടെയുള്ള കയ്യേറ്റങ്ങള്‍ പൊളിച്ചാണ് ആവശ്യമായ സ്ഥലം കണ്ടെത്തിയത്. എന്നാല്‍ നിലവിലെ സാഹചര്യത്തില്‍ റോഡിന്റെ വീതി ഏഴു മീറ്ററാക്കി വർധിപ്പിക്കുന്നതിനുള്ള സ്ഥലംപോലും കുറ്റിപ്പാല ഭാഗത്തില്ല. അങ്കണവാടിയുടെ ചുറ്റുമതില്‍ മാത്രം പൊളിച്ച്‌ റോഡിന്റെ വീതികൂട്ടാനുള്ള ശ്രമത്തിലാണ് കരാറുകാരും പിഡബ്ല്യുഡിയും. അങ്ങനെയായാല്‍ ഈ ഭാഗത്ത് ഓവുചാല്‍ എങ്ങനെ നിർമിക്കുമെന്ന് നാട്ടുകാർ ചോദിക്കുന്നു.
റോഡ് നവീകരണ പ്രവൃത്തിയുടെ ഭാഗമായി അങ്കണവാടി പ്രവർത്തിക്കുന്നത് സമീപത്തെ വാടക വീട്ടിലാണ്. 25 വർഷത്തിലധികം പഴക്കമുള്ള ഈ രണ്ട് കെട്ടിടങ്ങളും പൊളിച്ചു മാറ്റാൻ നഗരസഭാ കൗണ്‍സില്‍ യോഗം നേരത്തെ അനുമതി നല്‍കിയിരുന്നു. സാംസ്കാരിക നിലയം ഏറെ നാളായി ഉപയോഗ ശൂന്യമായി കിടക്കുകയാണ്. റോഡ് നവീകരണ പ്രവൃത്തിക്ക് ശേഷം അങ്കണവാടിയുടെ പ്രവർത്തനം ഈ കെട്ടിടത്തിലേക്ക് മാറ്റിയാല്‍ കുരുന്നുകളുടെ ജീവന് തന്നെ ഭീഷണിയാകും.
ഗതാഗതക്കുരുക്ക് പതിവായ മുക്കം-അഗസ്ത്യൻമുഴി-മാമ്പറ്റ റോഡിന്റെ ബദല്‍പ്പാത കൂടിയാണ് പിസി ജംഗ്ഷൻ-വെസ്റ്റ് മാമ്പറ്റ ബൈപാസ്. പദ്ധതി പൂർത്തിയാകുന്നതോടെ അഗസ്ത്യൻമുഴിയിലെ ഗതാഗതക്കുരുക്കിന് നേരിയ പരിഹാരമാകും. മുക്കത്ത് നിന്ന് കോഴിക്കോട്, താമരശേരി ഭാഗത്തേക്കുള്ള വാഹനങ്ങള്‍ക്ക് അഗസ്ത്യൻമുഴി വഴി സഞ്ചരിക്കാതെ ലക്ഷ്യ സ്ഥാനത്തേക്കെത്താനാകും. ബസുകളും ടോറസ് ലോറികളും ഉള്‍പ്പെടെ നൂറു കണക്കിന് വാഹനങ്ങളാണ് ഓരോ ദിവസവും ഇതുവഴി കടന്നുപോകുന്നത്.
0 Comments